Kilkenny County Council & Kilkenny Borough Council

Is cúis áthais domsa bheith bainteach le cur i láthair Thuarascáil Bhliantúil Chomhairle Contae agus Bhardas Buirge Chill Chainnigh don bhliain 2006.
Rinneadh dul chun cinn i mbliana ar fud an Chontae i dtionscadail bhonneagair éagsúla a bhain le gach seirbhís a bhfuil cur síos déanta uirthi sa tuarascáil seo lena n-áirítear bóithre, uisce, séarachas, tithíocht agus imshaol. Tá cuid de na tionscadail sin liostaithe anseo thíos:-

• Ainmníodh 82 theaghlach mar thionóntaí i dtithe de chuid an údaráis áitiúil.
• Úsáid na mbeart éagsúla faoi Scéim na dTithíochta Sóisialta agus Inacmhainne.
• Aistríodh 102 thionóntacht faoi Scéim na Cóiríochta ar Cíos. Cuireadh feabhas ar 69 dteach trí scéim chothabhála phleanáilte ghníomhach .i. trí sholáthar teasa lárnaigh, athsholáthar fuinneoga agus doirse etc.
• Is ar bhonn gníomhach a tugadh freagairt ar gach iarratas ar obair dheisiúcháin. I rith na bliana 2006 rinneadh obair dheisiúcháin ar iarratas 930 uair agus caitheadh ábhairín os cionn €1.5m ar obair chothabhála.
• Rinneadh dul chun cinn ar thionscadail bhonneagar bhóthair éagsúla le haghaidh bóithre náisiúnta agus neamhnáisiúnta.
• Cuireadh sraith de bhearta suaimhnithe tráchta i bhfeidhm ar fud an Chontae.
• Dúshlán mór a bhfuil Comhaltaí Tofa agus Oifigigh ag tabhairt aghaidh air is ea an gá atá le bonneagair riachtanacha uisce agus séarachais a chur ar fáil. Rinneadh measúnú ar riachtanas as an nua i 2006 agus cuireadh isteach é chuig an Roinn Comhshaoil, Oidhreachta agus Rialtais Áitiúil. Táthar ag déanamh uasdátú ar an measúnú agus beidh sé ina chuid de Chlár Infheistíochta na Seirbhísí Uisce 2007/2009.
• Cuireann an staitistic go raibh ardú de 24% ar líon na n-iarratas pleanála a fuarthas ó 2002 i leith ar ár gcumas luas an dul chun cinn ar fud an chontae a thomhas.
• Tá sé d'aidhm ag an gcomhairle Láithreán Fóntais Chathartha a bhunú i nDeisceart Chill Chainnigh Theas agus tugadh an aidhm sin céim eile chun cinn nuair a ainmníodh suíomh oiriúnach agus nuair a fuarthas tairiscintí soláthair. San idirlinn tá áis shealadach curtha ar fáil ag an Ráth Nua; beidh sin oscailte gach Sathairn.
• Táthar ag leanúint ar aghaidh le hobair ar thionscadail atá comh-mhaoinithe tríd an Scéim Ranníoca Forbartha. Ar thús cadhnaíochta maidir leis na tionscadail sin tá an dul chun cinn ar Pháirc Líneach Abhainn na Feoire, an obair leanúnach ar thionscadal Ghairdíní Woodstock agus na scéimeanna éagsúla athnuachana uirbí agus sráidbhaile.

Bunchuspóir i dtaca le Plean Corparáideach Údaráis Áitiúla Chill Chainnigh 2004-2009 is ea pleanáil agus bainistíocht a dhéanamh ar mhodh inmharthana ar fhorbairt agus ar úsáid na n-acmhainní ábhartha ar mhaithe leis an dul chun cinn fadtéarmach eacnamúil, sóisialta agus cultúrtha is leas do chách. Is cuid lárnach den chuspóir sin Plean Forbartha Contae atá cuimsitheach agus gníomhach. Tá tús curtha le hathbhreithniú an phlean reatha, ag tosú leis na comhairliúcháin phoiblí i ngach ceann de na Toghcheantair i 2006. I mí na Nollag 2006 tugadh tuarascáil bhainistíochta ar na comhairliúcháin phoiblí chun críche. Is iad na comhairliúcháin phoiblí sin an chéad chéim i bhfoirmliú Phlean Forbartha an Chontae 2008/2014. Beidh Plean Forbartha na Cathrach agus an Chontae maille leis na pleananna éagsúla limistéir áitiúil mar fhoras ag pleanáil straitéiseach Chathair agus Chontae Chill Chainnigh.
Straitéis tacaíochta eile sa Phlean Corparáideach is ea obair i gcomhpháirtíocht le páirtithe leasmhara tábhachtacha eile agus pleananna agus cláir éagsúla a chomhaontú agus a chur i bhfeidhm. Bíonn Údaráis Áitiúla Chill Chainnigh ag obair i gcomhar lena bpáirtithe i mBord Forbartha an Chontae ar bhonn leanúnach. I rith na bliana 2006 chuathas go dian i mbun obair forbartha ar fhostruchtúir chun na 9 ngníomh arna gcomhaontú in athbhreithniú méantéarma Straitéis an Chontae 2002 – 2012 a sheachadadh.
Is é an phríomhaidhm atá againn an réigiún a chur chun cinn ar mhaithe le saoránaigh uile an Oirdheiscirt. Tá ról tábhachtach ag Comhairle Contae Chill Chainnigh maidir leis an aidhm sin .i. Ceantar Belview a chur ar aghaidh mar láithreán tábhachtach le haghaidh Tionscail Straitéisigh i Réigiún an Oirdheiscirt. Is iad Comhairle Contae Cheatharlach agus Comhairle Contae Chill Chainnigh ag obair i gcomhar lena chéile a thug chun críche i 2006 Staidéar Forbartha agus Eacnamúil Ghráig na Manach/Tinnahinch, rud a thugann suntas don chomhoibriú traschontae.
At déanamh freastal ar an dá Phobal mar aon aonad amháin agus ar an gcustaiméir aonair, sin bunghné d'obair Údaráis Áitiúla Chill Chainnigh. Ar na bearta a rinneadh i 2006 bhí:-

• Ardú próifíle na Deisce Seirbhíse Custaiméara.
• Ar spreagadh ó chustaiméirí shocraigh an dá údaráis go n-osclófaí ag am lóin, áis a lainseáladh i dtosach ar bhonn píolótach.
• Bhíothas ag díriú ar bhonn leanúnach ar fheabhas a chur ar sheirbhísí do chustaiméirí inmheánacha agus seachtracha a bhí faoi mhíchumas. Tugtar aitheantas dó sin ar bhonn náisiúnta trí scéim Bronnta Gradam Cumais O2 agus tríd an obair a dhéanann Foireann Chlár Oibre Barcelona a bhfuil sé de ról aici an t-údarás áitiúil a stiúradh le linn dó a ghealltanais faoin Acht Um Míchumas a chomhlíonadh.
• Tá aitheantas tugtha d'obair Údaráis Áitiúla Chill Chainnigh maidir le seirbhís chustaiméara; tá sin déanta go náisiúnta maidir leis an tSeirbhís Phleanála ag Chambers Ireland agus maidir le Roinn na nAcmhainní Daonna ag an gCumann Tráchtála áitiúil.
• Ar spreagadh ó chustaiméirí tugadh isteach seirbhís thar an gcuntar chun bailiochtú a dhéanamh ar phleanáil i 2006.
• Ceapadh Oifigeach Bainistíocht Eastáit lántiomnaithe agus de thairbhe sin tá leibhéal an ionchuir ó thionóntaí ar na hEastáit laistigh dá raon cúraim ag dul i méid.
• Ceadaíodh cúram a thabhairt do líon áirithe de Chumainn Chónaitheoirí.
• Bíonn Údaráis Áitiúla Chill Chainnigh ag iarraidh cumarsáid ghníomhach a dhéanamh leis an bpobal. Sampla de sin is ea chur chun cinn leathanaigh choicísiúil dár gcuid sa Kilkenny People. Sampla eile de chumarsáid i ndáil le ceisteanna atá fíorthábhachtach don phobal is ea an Feachtas Feasachta um shábháilteacht ó dhóiteán a stiúrtar in éindí le Seirbhís Dhóiteáin Cheatharlach tríd an stáisiún raidió áitiúil. Tá ardmholadh tuillte acu siúd a bhíonn gafa leis an tSeirbhís Dóiteáin agus a eagraíonn cuairteanna scoile ar an Stáisiún Dóiteáin go tráthrialta agus a rith dianfheachtas Feasachta le linn Seachtain Náisiúnta Sábháilteachta ó Dhóiteán.
• Réimse seirbhíse eile a bhíonn go mór chun tosaigh sna pobail áitiúla is ea na leabharlanna éagsúla bíodh siad ar leibhéal lárnach nó ar leibhéal brainse. Tá na seirbhísí a dhéanann na leabharlanna léirithe go mion sa chuid sin den Tuarascáil Bhliantúil seo a dhéileálann leis na hEalaíona, an Cultúr agus an Oidhreacht.
• Maidir leis an bPrótacal um Eastáit a thógáil faoi chúram tugadh chun foirfeachta é i 2005 agus anois is léir go bhfuil tionchar dearfach aige agus tá polasaí aontaithe faoina dtógfar 2 Eastát in aghaidh an Toghcheantair faoi chúram i 2006.
• Réimse amháin atá chun tosaigh maidir le héilimh chustaiméara a shásamh is ea an Roinn Pleanála. I 2006 dhéileáil an Roinn Pleanála le níos mó ná 64,000 glaoch teileafóin, le 7,500 custaiméir ag an Deasca Eolais agus casadh Baill Foirne le nach beag 2,000 cliant ag clinicí pleanála for-rochtana.
• Ar bhonn laethúil tá glantachán sráide ina réimse feidhme fíorthábhachtach sna pobail áitiúla. Faoi théarmaí an chonartha nua a cuireadh tús leis i mBealtaine 2006 glanfar na Bailte agus na Sráidbhailte uile ar bhonn míosúil agus glanfar na ceantair taobh amuigh de cheantar Phort Láirge ar bhonn seachtainiúil.
• Tá cur chuige gníomhach glactha ag Údaráis Áitiúla Chill Chainnigh maidir le hoideachas agus feasacht chomhshaoil; beifear ag cur Scoileanna Brait Ghlais, Lá Saor ó Charr, cuairteanna tráthrialta agus cabhair do Scoileanna agus do Ghrúpaí Pobail chun cinn.
• Táimid ag comhlíonadh an ghealltanais maidir le hathrú eagraíochtúil; cuirfear béim ar na feabhsúcháin atá déanta ar an tseirbhís chustaiméara faoi théarmaí chomhaontuithe na páirtíochta sóisialta náisiúnta .i. an Dul chun Cinn a Bhuanú agus a chomharba i dTreo 2006.

Ba mhaith liom a rá gur mór agam dúthracht agus coimitmint Mheitheal Bhainistíochta agus Fhoireann Údarás Áitiúil Chill Chainnigh agus an obair crua atá déanta ag na Comhaltaí Tofa. Is mian liom go háirithe mo bhuíochas a ghabháil le m'iar-chomhghleacaithe Tom Gunning a d'éirigh as mar Stiúrthóir Seirbhísí Bóithre agus Sláintíochta i mí Mheán Fómhair 2006. Rinne an tUasal Gunning maille le baill foirne eile a d'éirigh as le gairid fóntas fíorluachmhar d'Údaráis Áitiúla Chill Chainnigh leis na blianta fada.
Is mian liom an Cathaoirleach an Comhairleoir Billy Ireland a mholadh go háirithe maille leis an iarChathaoirleach an Comhairleoir Maurice Shortall agus Méara Chill Chainnigh an Comhairleoir Martin Brett agus an tIarmhéara an Comhairleoir Marie Fitzpatrick as a gcoimitmint agus a ndúthracht i dtaca le cur chun cinn an Chontae agus na Cathrach. Is mian liom freisin mo bhuíochas a ghabháil leis na Cathaoirligh agus le Comhaltaí gach ceann de na Coistí Polasaí Straitéisigh agus le gach ceann de na Coistí Ceantair as an sárobair atá déanta ag na grúpaí sin i rith na bliana.
Creidim go léifidh muintir Chill Chainnigh i bhfad agus i gcéin an tuarascáil bhliantúil seo agus go dtabharfaidh sí forléargas dóibh ar réimse leathan na ngníomhaíochtaí a bhfuil na húdaráis áitiúla a thabhairt fúthu. Bheinn dóchasach go dtabharfadh sé léargas dóibh ar na dúshláin a bhfuil an Rialtas Áitiúil ag tabhairt aghaidh orthu sa lá atá inniu ann agus tuiscint faoin gcaoi a bhfuilimid .i. Údaráis Áitiúla Chill Chainnigh ag iarraidh aghaidh a thabhairt ar na dúshláin sin.
M.Malone, Bainisteoir Contae.